Зельвенцы играли в болотный футбол и плавали «на чем попало»
Зэльвенцы гулялі ў балотны футбол і плавалі “на чым папала” падчас абласнога фестывалю “Аўгустоўскі канал у культуры трох народаў”, які адбыўся ў мінулую суботу на шлюзе Дамброўка.
З самай раніцы на імправізаваным полі, запоўненым граззю, праходзілі спартыўныя баталіі. Хто лепш гуляе ў балотны футбол, высвятлялі 24 каманды з усей Гродзеншчыны.
Відовішчнай выдалася сустрэча нашых спартсменаў з прадстаўнікамі Дзятлаўшчыны. З першых хвілін гаспадарамі мяча сталі зэльвенцы і павялі ў ліку. Хутка зраўнялі ачкі і сапернікі. Каб выявіць пераможцу, камандам далася магчымасць адыграцца ў серыі пенальці. І тут фартуна ўсміхнулася нашым футбалістам.
Не менш захапляльным быў матч з камандай Скідзеля. Рухацца па полі спартсменам ужо было складаней – работнікі пажарнай службы перыядычна падлівалі на пляцоўку ваду. Зэльвенцы ўмела валодалі мячом, зладжана рабілі падачы. У выніку – забіты гол у вароты праціўніка. Прызёры мінулагодняга абласнога чэмпіянату па міні-футболе, скідзельцы ніколькі не саступалі. Асабліва напружанымі сталі апошнія хвіліны сустрэчы. Балельшчыкі гучна падтрымлівалі ўдзельнікаў, кожнаму жадалі выйсці ў лідары. У выніку перамогу з перавагай у адно ачко атрымалі футбалісты са Скідзеля.
І хоць першага месца варатару Івану Мацюку, абаронцам Дзмітрыю Каленчуку, Андрэю Іванову, нападаючым Алегу Алюшкевічу, Дзянісу Ламеку, паўабаронцу Ільі Бычаку, ігракам Яўгенію Магільніцкаму і Ільі Дзікевічу заняць не здалося, удзел у такім незвычайным і азартным відзе спорту запомніцца нашым канкурсантам масай станоўчых эмоцый.
З нецярпеннем гледачы чакалі пачатку абласных спаборніцтваў па плаванні “на чым папала”. На водную гладзь спусцілі 19 самаробных плавальных сродкаў. Іх тэматыка была даволі разнастайнай – ад Новага года да летніх Алімпійскіх гульняў у Рыа-дэ-Жанейра.
Цікавасць прахожых выклікаў ветразь з надпісам “Вялікі Ганненскі кірмаш у Зэльве”.
Па словах супрацоўнікаў раённага аддзела ўнутраных спраў Леаніда Мачка і Сяргея Федзяні, плаўсродак выкананы па задумцы архітэктара Дзмітрыя Кірэенкі, у аснове – пластыкавыя каністры. Прадстаўнікі Зэльвенскага раёна расказвалі ўдзельнікам фестывалю аб кірмашы і шчыра запрашалі прыехаць да нас на гэтае культурнае мерапрыемства 26 і 27 жніўня.
Наталля МАЦЮК.