Свята піянерскага актыву

Піянерскія дружыны Зэльвеншчыны прынялі ўдзел у раённым свяце “Піянерскім традыцыям верныя”, якое адбылося ў паркавай зоне пасёлка.

Агульны збор актывістаў раённай арганізацыі БРПА “Ветразь” быў прымеркаваны да Дня Беларускай рэспубліканскай піянерскай арганізацыі. Па традыцыі ў гэты дзень аб’яднанне папоўнілася новымі членамі.

Права павязаць чырвона-зялёныя гальштукі хлопчыкам і дзяўчынкам было дадзена ганаровым гасцям – начальніку аддзела адукацыі, спорту і турызму Сяргею Лойка, старшыні раённай арганізацыі РГА “Белая Русь” Ліліі Серык, ветэранам піянерскага руху, членам саветаў дружын.

З наказам да ўчарашніх акцябратаў звярнуўся кіраўнік сістэмы адукацыі раёна Сяргей Лойка. Сяргей Мікалаевіч пажадаў падлеткам з гонарам насіць прысвоенае ім званне “піянер”, выдатна вучыцца, карыснымі справамі праслаўляць родную школу.

У сваю чаргу юныя піянеры падзякавалі за аказаны ім давер. Быць членам арганізацыі – асаблівы гонар, але разам з тым і адказнасць. Любіць сваю Айчыну, берагчы прыроду, паважаць старэйшых, быць прыкладам для малодшых дзяцей, заўсёды прытрымлівацца Статута і традыцый БРПА – вось толькі некалькі пунктаў з піянерскай клятвы.

Затым вучні разам з класнымі кіраўнікамі, педагогамі-арганізатарамі накіраваліся да брацкай магілы савецкіх воінаў і партызан, каб аддаць даніну памяці героям Вялікай Айчыннай вайны, ускласці кветкі.

Працягнулася мерапрыемства ў будынку СШ №2 і гімназіі №1 пасёлка. Для малодшых школьнікаў быў прапанаваны прагляд відэафільма “Цімур і яго каманда”. Старэйшыя вучні з задавальненнем праявілі сябе ў квэст-гульні.

– Мяркую, што хлопчыкі і дзяўчынкі запомняць свой урачысты прыём у рады піянерскай арганізацыі, – адзначае старшыня раённай арганізацыі БРПА  “Ветразь” Надзея Вароніна. – А іх стаўленне да вучобы, паводзіны, удзел у добрых і карысных справах будуць служыць доказам таго, што яны годна выканаюць дадзенае абяцанне піянераў.

Наталля МАЦЮК.

Добавить комментарий

Этот сайт использует Akismet для борьбы со спамом. Узнайте как обрабатываются ваши данные комментариев.