Лыжка як напамін аб былым, або Аб чым расказала дзіця вайны Марыя Баглай

Лыжка як напамін аб былым, або Аб чым расказала дзіця вайны Марыя Баглай 

Жыхарка вёскі Запруддзе Марыя Баглай падзялілася з работнікамі сектара па нестацыянарным абслугоўванні насельніцтва цэнтра культуры ўспамінамі аб перажытым у перыяд Вялікай Айчыннай. 

Разважанні яе, дзіцяці вайны, сталі сведчаннем мінулага, адлюстравалі непасрэдныя адчуванні дзяўчынкі ваеннай пары і імкненне сучаснай жанчыны сталага веку бачыць мірнае жыццё дзяцей і ўнукаў. Дарэчы, гэтыя ўспаміны і былі пакладзены ў аснову відэароліка “Дзеці вайны”, створанага так званымі аўтаклубаўцамі. А штуршком да рэалізацыі дадзенага праекта паслужыла лыжка, якую з пасляваеннага часу беражліва захоўвае Марыя Уладзіміраўна.

Жанчына ўсхвалявана расказала пра тое, што назаўсёды засела ў яе свядомасці. Пра тое, як сям’я выжывала з прыходам у вёску фашыстаў, як у іх забралі карову, як немцы заставілі маму і яе цётку гатаваць ім ежу. Прыгадала, што не раз знаходзілася на грані паміж жыццём і смерцю, калі з аднавяскоўцамі хаваліся ў самых розных месцах. 

І праз восем дзесяткаў гадоў жывыя гэтыя яе ўспаміны. Яны сталі яскравым прыкладам сілы духу і надзеі, якія не паміраюць нават у самых цяжкіх умовах. Дзяўчынка, можна сказаць, цудам выжыла пасля абстрэлу з варожага самалёта. А калі праз вёску прайшоў фронт, усіх працаздольных мужчын накіравалі ў дзеючую Савецкую Армію. І з 33 чалавек трэцяя частка не вярнулася дамоў. Бацьку, які дайшоў з войскам да Венгрыі, пашчасціла зноў убачыць сваіх. Лыжка, якую ён прывёз, і цяпер напамінае жанчыне пра роднага чалавека.

Што для большасці людзей здаецца дробяззю, часам мае вялікае значэнне для той ці іншай асобы. А ў выпадку Марыі Баглай такі прадмет паўсядзённага побыту, як лыжка, сімвалізуе сувязь шматлікіх пакаленняў яе сям’і. І ў тым, пра што расказала наша зямлячка, кожны з нас, беларусаў, бачыць і адгалоскі гісторыі свайго роду, дзяцінства прадстаўнікоў якога апаліла бязлітасная вайна.

Любоў ШЭЙКА

Интересные и актуальные новости Зельвенского района в нашем Telegram-канале. Подписывайтесь по ссылке!