У конкурсе на лепшы падворак на Ганненскім кірмашы перамог Крамяніцкі сельсавет і філіял «Князева»
Кожны год на Ганненскім кірмашы падворкі сельвасетаў і сельскагаспадарчых арганізацый ствараюць вясёлую атмасферу свята, маюць цікавае і адметнае афармленне.
Так было і на гэты раз: гаспадары шчыра запрашалі ўсіх жадаючых зайсці да іх на падворак, дэманстравалі традыцыйныя прадметы хатняга абіходу, частавалі беларускімі прысмакамі і забаўлялі народнымі гульнямі, песнямі, танцамі.
Сялянскі быт адлюстроўваўся на рамесным падворку Сынкавіцкага сельсавета і СВК “Сынкавічы”. Тут былі шырока прадстаўлены самаробныя іконы, ткацкія вырабы, керамічны посуд. Майстры-ўмельцы праводзілі для жадаючых майстар-класы.
Весялосць і адкрытасць “цыганскага этнасу” перадавалі падворкі Дзярэчынскага і Галынкаўскага сельсаветаў і СВК “Галынка”. Работнікі ўстаноў культуры вельмі добра пераўвасобіліся ў цыганоў, а рамансы і песні ў іх выкананні выклікалі бурныя апладысменты ўсіх гасцей.
Зэльвенскі сельсавет і СВК “Бародзічы” арганізавалі тэатральны падворак. Гасцей запрашалі стаць гледачамі інсцэніровак “Паўлінка”, “Мікітаў лапаць”, “Збянтэжаны Саўка”. Дарэчы, апошнія прадстаўленні мелі інтэрактыўны характар: паўдзельнічаць у міні-спектаклях маглі ўсе жадаючыя.
Не сціхала музыка на музычна-інструментальным падворку Каралінскага сельсавета і СВК “Караліно”. Маладыя “яўрэйкі” сустракалі гасцей свята песнямі і танцамі. Музычныя інструменты: бубны, скрыпкі, балалайкі, шалестуны гучалі на ўсю моц.
Звонкі дзіцячы смех даносіўся з падворка “Дабро сельскае”. Сельскагаспадарчы філіял “Дабрасялецкі” і сельсавет арганізавалі зону адпачынку для дзетак, дзе яны маглі праявіць сябе ў традыцыйных беларускіх гульнях. Ад жадаючых загнаць цвічок у калодачку, занесці чыгун у печ не было адбою. На ўсіх падворках гаспадары праяўлялі гасціннасць, частавалі гасцей малаком, варанай бульбай, печанымі яйкамі, духмянымі дранікамі, садавінай і ягадамі.
“На танцулькі да Паўлінкі” запрашаў на Ганненскім кірмашы Тулаўскі сельскі савет і СВК “Міжэрычы”. Гасцей сустракаў сімвал падворка – паўлін, зроблены з жыта. Гаспадары вучылі ўсіх прысутных танцам: лявонісе, кракавяку, польцы.
Па ўсей вуліцы разносіўся пах смажанай бульбы: гэта на падворку “Нацыянальнай кухні” Крамяніцкага сельсавета і філіяла “Князева” частавалі дранікамі, бульбай са шкваркай і квасам, зробленым па старадаўнім рэцэпце. Таму тут былі асабліва шматлюдна. Накармілі ўсіх!
Па выніках конкурсу на лепшае афармленне падворка, першае месца занялі філіял “Князева” і Крамяніцкі сельсавет. Другое – СВК “Бародзічы” і Зэльвенскі сельсавет. Трэцяе месца прысуджана СВК “Галынка”, Дзярэчынскаму і Галынкаўскамуі сельсаветам.
Дзіяна БЕБЕХ.